పహల్గాం ఉగ్రదాడి తర్వాత బాలీవుడ్‌ ఖాన్ త్రయమంతా మౌనంగా ఉండటం మీద దేశవ్యాప్తంగా విమర్శల వర్షం కురిసిన సంగతి తెలిసిందే. “దేశం ప్రమాదంలో ఉంది.. కానీ స్టార్‌ హీరోలు మౌనంగా ఎందుకు ఉన్నారు?” అనే ప్రశ్నలు సామాజిక మాధ్యమాల్లో విస్తృతంగా ట్రెండ్ అయ్యాయి. ఈ నేపథ్యంలో తాజాగా ఓ చానల్ షోలో ఆమిర్ ఖాన్ ఇచ్చిన క్లారిటీఇప్పుడు హాట్ టాపిక్ అయింది.
“భారత సినీ చరిత్రలో తొలిసారిగా పాకిస్థాన్‌ను శత్రుదేశంగా చూపిన సినిమా ‘సర్ఫరోష్‌’. ఆ సినిమాలోనే ‘పదోషి ముల్క్‌’ అంటూ స్పష్టంగా చూపించాం” అంటూ ఆమిర్ ఖాన్ తన దేశభక్తి గురించి వివరించారు.
పాక్‌ సెన్సార్ బోర్డు షరతులు.. ఆమిర్ ఖాన్ తేల్చేసిన మాట
ఆమిర్ అసలైన దేశభక్తిని చూపించింది ‘దంగల్’ చిత్రం విడుదల సమయంలో జరిగింది.
“డిస్నీ వాళ్లు ‘దంగల్’ను పాకిస్థాన్‌లో రిలీజ్ చేయాలనుకున్నారు. కానీ అక్కడి సెన్సార్ బోర్డు, చివరి సీన్‌లో జాతీయ గీతం, త్రివర్ణ పతాకం ఉండకూడదని షరతులు పెట్టింది. నేను ఒక్క క్షణం కూడా ఆలోచించకుండా, ‘ఇలాంటి షరతులతో సినిమాను అక్కడ రిలీజ్ చేయను’ అన్నాను” అంటూ స్పష్టం చేశారు.
“మన జెండా తీసేసి, గీతం తొలగించి వచ్చే బిజినెస్ నాకు అవసరం లేదు” అని గట్టిగానే చెప్పిన ఆమిర్… తాను దేశానికి మద్దతుగా నిలవడానికి వస్తున్న నష్టాలనూ పక్కన పెట్టానని అన్నారు.
“చైనా రిలీజుకి పరిస్థితులు వేరుగా ఉన్నాయి”
చైనాలో ‘దంగల్’, ‘సీక్రెట్ సూపర్‌స్టార్‌’ సినిమాలకు వచ్చిన స్పందన గురించి కూడా స్పందించారు.
“ఆ సమయంలో మనం చైనాతో శాంతియుత సంబంధాల్లో ఉన్నాం. ఆ పరిస్థితులు ఇప్పటి లాంటి ఉద్రిక్తతలేమి కాదు. కాబట్టే విడుదల చేశాం” అని క్లారిటీ ఇచ్చారు.
జవాన్లతో కలిసి ఏడురోజుల యాత్ర.. కార్గిల్ జ్ఞాపకాలు
ఆమిర్ ఖాన్ చెప్పిన మరో విషయం – కార్గిల్ యుద్ధం తర్వాత లేహ్‌లో జరిగిన ఆయన యాత్ర. “ఎనిమిది రోజుల పాటు ఆర్మీ క్యాంపుల్ని సందర్శించాను. జవాన్లతో కలిసి భోజనం చేశాను. వాళ్లు ఎలా పోరాడారు, ఎలాంటి క్లిష్ట పరిస్థితుల్లో నిలబడ్డారు అనేది తెలుసుకున్నాను. నాకు జీవితాంతం గుర్తుండిపోయే అనుభవం అది” అని భావోద్వేగంగా వివరించారు.
ఇప్పుడు ‘సితారే జమీన్ పర్’తో తిరిగి వస్తున్న ఆమిర్
ఇంతమంది విమర్శిస్తున్నప్పటికీ, ఆమిర్ ఖాన్ తాను చేస్తున్న పనులపై నమ్మకంగా ఉన్నట్టు స్పష్టంగా చెప్పుకున్నారు. ఈ సందర్భంగా ఆయన నటించిన కొత్త చిత్రం ‘సితారే జమీన్ పర్’ జూన్ 20న విడుదలకు సిద్ధంగా ఉంది.
